کائنا ت کا کوئی بھی والد مرتبے میں حضرت عبداللہ رضی اللہ تعالیٰ عنہ سے بڑھ نہیں سکتا کیونکہ آپ اس عظیم ہستی کے والد ماجد ہیں جو اللہ رب العالمین کے محبوب اور سردار الانبیاء ہیں ۔اور اس عظیم ہستی کے والد ہیں جن کے ظاہرہوتے ہی ہدایت کی روشنی اتنی پھیل گئی کہ اس کے بعد کسی دوسرے نور ہدایت کی ضرورت ہی نہ رہی ۔جس نے اپنی شبانہ روز محنت سے انسان کا ٹوٹا ہوا رشتہ اس کے رب سے جوڑ دیا ۔حضرت عبد اللہ رضی اللہ تعالیٰ عنہ حضرت عبدالمطلب رضی اللہ تعالیٰ عنہ کے سب سے چھوٹے اور سب سے لاڈلے بیٹے تھے۔

آپ کے والد نے نذر مانی تھی کہ اگر اللہ تعالیٰ نے انہیں دس بیٹے عطا کیے اور و ہ سب جواں اور صحت مند ہو کر ان کی تقویت کا باعث بنے تو وہ ان میں سے ایک بیٹا اللہ تعالیٰ کی راہ میں قربان کریں گے ۔جب حضرت عبدا للہ کی عمر اٹھار ہ یا بیس سال ہو گئی تو انہیں اپنی نذر پوری کرنے کا خیال آیا۔ آپ نے اپنے بیٹوں کو طلب کیا اور انہیں اپنی نذر کے بارے میں بتایا تو سب بیٹوں نے بڑی سعادت مندی کا اظہارکیا اور سر جھکا دئیے اور ادب کے ساتھ عرض کیا کہ ہمارے والد محترم ! آپ اپنی نذر پوری کیجئے اور ہم میں سے جس کا نام آئے گا وہ فخر کے ساتھ اپنے سر کا نذرانہ پیش کر دے گا۔سب نے فیصلہ کیا کہ بیت اللہ شریف کے فال نکالنے والے کے پاس جاتے ہیں اور جس کے نام کا قرعہ نکلے گا اسے اللہ کی راہ میں قربان کیا جائے گا ۔سب مل کر بیت اللہ شریف میں فال نکالنے والے کے پاس گئے اور اسے صورتحال سے آگاہ کیا جب فال نکلا تو اس میں حضرت عبد اللہ رضی اللہ تعالی عنہ کا نام تھا ۔ آپ سب بیٹوں سے زیادہ خوبصورت اور سیرت وکردار میں افضل تھے ۔حضرت عبدالمطلب نے حضرت عبد اللہ رضی اللہ تعالیٰ عنہ کو اللہ کی راہ میں قربان کرنے کے لیے چھری منگوائی اور آستینیں چڑھانے لگے ۔اس بات کی خبربجلی کی طرح مکہ کے ہر گھر میں پھیل گئی ۔قریش کے بڑے بڑے رئیس اپنی مجلسوں سے دوڑتے ہوئے پہنچ گئے اور مکہ کے سردار کہنے لگے کہ ’’اے عبدالمطلب! ہماری آنکھوں کے سامنے چاند سے زیادہ خوبصورت اور پھول سے زیادہ نازک بدن والا عبدا للہ قربان ہو جائے۔ہم ہر گز ایسا نہیں ہونے دیں گے‘‘ تو حضرت عبدالمطلب نے فرمایا کہ ’’یہ میرا اور میرے رب کا معاملہ ہے تم اس میں دخل اندازی مت کرو ۔میں نے اپنے رب سے جو وعدہ کیا تھا اس کو ہر قیمت پر پورا کروں گا‘‘۔آپ نے اپنے پختہ عزم کا اظہار ان الفاظ سے کیا:

ترجمہ: ’’ میں نے اپنے رب سے عہد کیا ہے اور میں اپنے اس عہد کو پورا کروں گا بخدا کسی چیز کی ایسی حمد نہیں کی جاتی جس طرح اللہ تعالیٰ کی حمد کی جاتی ہے ۔جب وہ میرا مولا ہے اور میں اس کا بندہ ہوں اور اس کے لیے میں نے نذرمانی ہے تو میں اس بات کو پسندنہیں کرتا کہ میں اس نذر کو مسترد کر دوں پھر مجھے زندہ رہنے کی کوئی خواہش نہیں۔‘‘